थांरौ साथो घणो सुहावै सा…

22.7.13

अणहद-नाद सुणीजै घट


श्री गुरुवे नमः
जयरामजी री सा !
गुरुपूनम री आप सबनैं मंगळकामनावां !

सगळां पर गुरुजनां री आशीष बणी रैवै   
आओ , इण मौकै म्हारी आ रचना बांचो अर सुणो
श्री गुरुवे नमः

जद उमगै उर ज्ञान-पिपासा !
बिन दीवटियां होय उजासा !

निज कळमष हाथां प्रक्षाळ्यां'
घट झड़ बरसै बिन चौमासा !

नाश वासना होवै सगळी ,
फीसै पाणी मांय पताशा !

ब्रह्म-जीव , जड़-चेतन , अपरा-
परा विभंजै खेल-तमाशा !

भेद मिटै अद्वैत-द्वैत रौ ,
सुलटा ही सुलटा सै पासा !

थित-प्रगळभ नैं मिळै ; निराशा 
मांय अलौकिक-ऊंडी आशा !

अणहद-नाद सुणीजै घट ; तद 
किसड़ा ढोल नगाड़ा ताशा ?

कीं सांसा  नीं  संतोष्यां रै ,
सैंठा भरिया रैवै कांसा !

मिळ जावै सतगुरु धन राजिंद
कट जावै कळि-भव-जम-पाशा !
-राजेन्द्र स्वर्णकार
 ©copyright by : Rajendra Swarnkar

अठै सुणो


लारला केई महीना अबखायां सूं भर्'या हा । 
नेट री समस्या , ब्लॉग गायब होणै री समस्या , पीसी में खराबी , थोक में कमेंट ई डीलेट हुयग्या । हारी-बेमारी अर एढा-टांकड़ा , यात्रा-बा'रवास , रिश्तेदारी-समाजू कामां में व्यस्तता आदि । आप सब म्हनैं याद करता रै'या ...आभार ! म्हनैं भी आपरी घणी ओळ्यूं आ'ती रैयी
आस करूं , अबै स्सौ कीं ठीक अर माफिक रैसी ।
नुंवा साथीड़ां रौ हिवड़ै सूं स्वागत !
जूना साथीं‌ड़ां रै सनेह खातर मोकळो आभार !

मिलसां बैगा ई
रामराम सा

***अठै ई पधारजो सा***

1 टिप्पणी:

रविकर ने कहा…

बढ़िया प्रस्तुतियों हेतु आभार आदरणीय-

गुरुपूर्णिमा के शुभ अवसर पर
परम गुरु की सादर वन्दना-

सादर नमन-